Рэжысёр: Раман Блажан
Украіна, 2020, 26 хв.
Мова: украінская, руская (субтытры: англійская, нямецкая).

«Уваход праз балкон» – гэта падарожжа праз дзесяцігоддзі і погляд на балконы і іх гаспадароў у розных гарадах Украіны. Гэты дакументальны фільм даследуе дзіўны архітэктурны феномен самаробных украінскіх балконаў. Адсутнасць дзяржаўнага рэгулявання дазваляе ўкраінцам будаваць любыя балконы, незалежна ад стылю будынка. Часам у выніку імправізаванага рамонту балконы становяцца больш, чым сама кватэра.
«Уваход праз балкон» здымалі ў васьмі гарадах Украіны: у Кіеве, Адэсе, Харкаве, Львове, Дняпры, Вініцы, Палтаве, Гарышніх Плаўнях.
Праз гісторыю феномена балконаў фільм даследуе гісторыю постсавецкай Украіны – яе жыццё, культуру і адносіны паміж асабістай і грамадскай прасторамі ў гарадах. Гэта ўзважаны і глыбокі погляд на балконы з боку іх гаспадароў, гарадскіх уладаў, гісторыкаў, сацыёлагаў, горадабудаўнікоў і архітэктараў. Гэты лірычны любоўны ліст да Украіны і яе народа даследуе, як архітэктура можа стаць цікавым шляхам да больш глыбокага разумення культуры і прасторы.